A iniciativa máis demandada na asemblea
de barrio de Doniños é a devolución dos
montes de Cha.
Mércores, 25 de Abril de 2012.
redacción > ferrol .
Un total de 52 veciños de Doniños consideraron prioritaria a proposta de devolución dos montes de Cha na asemblea dos orzamentos participativos celebrada o pasado venres en Valón, na que tamén se reclamou para esta zona a instalación de semáforos na estrada desta parroquia e a instalación da rede de sumidoiros, con 25 respaldos en cada caso.
En total presentáronse 152 propostas, que os técnicos agruparon en 25 e que se relacionan con novas tecnoloxías, patrimonio cultural e lecer, ensino e deporte, medioambiente e desenvolvemento rural, mobilidade e seguridade viaria e obras e urbanismo.
Entre as iniciativas que foron propostas por maior número de persoas están a construción dun novo camiño asfaltado ao Bosque dous Nenos, en Valón, a mellora do sinal de televisión, a execución das propostas aprobadas nas asembleas dos orzamentos participativos de 2009 e 2010, a mellora da zona de recreo da praia de Penencia (Doniños) coa plantación de árbores, aparcadoiro, habilitación dun miradoiro, etc. ou a recuperación e rehabilitación das baterías militares de costa en Prioriño (Lobateiras e Atalaia) a través de xestións co Ministerio de Defensa.
Neste mesmo encontro escolleuse para as vicepresidencias da asemblea de barrio de Doniños a Rosa Méndez Fonte e Tomás Cabezón Lorenzo, mentres que como representantes do barrio no Consello da Veciñanza elixiuse tamén a Rosa Méndez e a Magdalena González Grandal.
No hay comentarios:
Publicar un comentario